Bhag Gaya Billu...

 

Ruskin bond ne kaha hai ki ek lekhak kabhi akela nahi ho sakta, unki ye baat mujhe bahut acchi lagi kyunki mai khud bhi apne me ek chota mota lekhak 
pata hoon, aur shayad isiliye akelepan me kuch likhna mujhe sabse accha lagta hai. Aaj bahar park me baithe baithe laga ki chalo koi purani yaad kahani 
bana di jaye, so jut gaya. Ye kahani mere bachpan ki hai aur bahut hi majedar kissa hai isiliye ise likh raha hoon.

Aaj se lagbhag 18-19 saal pahle ki baat hai , mai bahut chotta tha shayad 5-6 saal ka, aur is umra k bacchon ko shayad hi mummy k darr se ghar me rahna accha lagta ho. Mere bachpan me logon ko patang udane ka bahut shauk hota tha aur dopahar me bhi chat me chadkar log patangbaji kiya karte. Wo patang udate dhoop me aur meri ma kamre se bahar bhi na jane deti. Bas kisi tarah se bahar k angan me khade hokar patango ko niharte the, lagta tha ki bas hum bhi aise khulkar ud jayen. Ma to khana khane k baad so jati thi par hum bacchon ko neend kahan, uspar ye ki mai 3 bahno k baad sabse chota bhai, to sath me khelne wala bhi koi nahi. Didiyon ki gudiyon me mujhe koi shauk nahi tha aur mere sath jo ghar me daud bhag khel sake aisa bhai tha nahi. Kabhi kabhi mere ghar k samne rahne wale mere hi ham-umra judwa bhaiyon ko dekhar mujhe lagta ki kash mera bhi judwa bhai hota.

Inhi khyalon me jeete hue bas bachpan me dopahar mere liye boriyat k alawa kuch nahi hoti thi, ghar me kacchi deewalon ki eeton se baat karta rahta tha, kacche mitti k farsh pe lakiren khecchta to kabhi farsh par lipe gobar ki parten hatata. Ghar se us samay koi bhi bahar jata to man karta bas peeche ho lun, par ma ki shakt hidayat thi ki ise koi dhoop me nahi le jayega aur meri dd bhi janti thin ki ise le jane me khatra hai , jane kab kya jidd kar de ya fir kya udham macha de. Khair ek din aisa mauka aa hi gaya ma ne sabse choti wali dd ko desi-ghi kharid lane k liye kaha, ghi ki dukan kafi dur thi mera man ho utha ki mai bhi jaunga. Paidal jana tha fir bhi mai utawala tha, kyunki bas mujhe bahar jana tha.Din ka 11 baj raha tha aur mausam yahi basant ka , dhoop fir bhi thodi tej thi so ma ne fir mana kar diya. Dd ne ghi ka dibba liya aur chal padi , mai bas rone ko hi tha lekin anshu jabt kar liye, gaal gusse se ful gaye aur aankhen pani ko nikalne dene se kaskar roke hui thi. Hoth kaskar bhinche hue aur bas aisa lag raha tha ki kranti aa jayegi, maine bhi than li akhir bahut jiddi tha main.

Fir Billu(yani mai) ne dd k jate hi gate khola, us din dd upar wala kunda lagana bhul gayi thi so maine main gate khol liya aur ghar se bhag nikla. Peeche ma ne dekha to wo chinta me pad gayin ki ye nadan kahan chala gaya. Ma pareshan ho rahi thi aur idhar mai poore mood se ghar se bhaga tha. Meri gali k kone me mere dost Anshu ka naya ghar ban raha tha usme bahar ki taraf dukane banayi gayi thi. Mai bas unhi me jakar chhup gaya, soch raha tha ki sabko bataunga billu kya cheej hai?. Lagbhag 15-20 min baad maine dekha dd wapas aaa rahi thi, ghi ka dibba hath me liye ,mai use dekhkar aur chhup gaya. Mai unhi khuli dukanon me jane kyun chhup raha chahta to kahin aur bhag sakta tha , par darr yahi tha ki jyada door bhaga to sham ko papa bahut marenge. Aakhir un dino sabse khatarnak dhamki ma yahi deti thi "PAPA KO AANE DO...." . Isi beech ma ne ghar k paas hi rahne wale mere dost ravi aur govinda ko mujhe dhundne bheja, jab dd wapas aayi to wo dono bhi dd k sainik bankar mujhe dhundne nikle.

Jasoos didi apne chelon k sath unhi dukanon me mujhe dhundne aa gayi, dukanon me shutter to tha nahi so mai bas kone me dubka khada ho gaya. Ravi chilla raha tha "Bailu Kho gaya", "Bailu bhag gaya" aur dd kah rahi thi "dhundo yahin kahin hoga".Mera man kar raha tha ki bahar nikalkar ravi k baal noch lun aakhir usne mera naam bigada kaise.Lekin mai is chote gusse ko apne bade gusse k liye pee gaya. Khair mujhe pata nahi haan par dd aur ma ko thoda darr to laga hi hoga ki jane kahin dur na nikla ho. Par dd ka shak sahi nikla aur Ravi ne mujhe dhund liya aur kas k chillaya "Bailu mil gaya didi".Maine fir bhagne ki koshish ki par pakda gaya, Aakhir Billu Badshah (mohalle wale mujhe isi naam se pukarte the , ab shayad mere bachpan ko yaad karke hi ye naam lete honge) ne haar maani aur dd ne kas k hath pakad k mujhe ghar la patka. Ma k samne mai aise khada hua jaise bhagat singh angrejon k samne khade hon aur khulkar bola "agli baar bahar jane nahi diya to isse bhi dur bhag jaunga". Iske baad ma ne mujhe mara ya nahi ye mai bhul gaya par haan jab tak bada nahi hua tab tak ghar me aise hi bandhe rahna pada halanki is ghatna k baad kabhi kabhi ma mujhe dd k sath bhej deti thi. 

Aaj mai yahan hun aur kafi bada bhi, aane jane ki ajadi hai par lagta hai ki wo samay jab ma se lag kar sote the to jyada accha tha. Aaj mitti ka farsh nahi hai to yaad aati hai mitti ki khusbu, aaj deewaron pe mehnge paint hain lekin mujhe un lal iton se jyada pyar tha jo inke andar chupe hain. Basant k mausam me jab dhool udkar ghar k farsh par baithti to mai usme pair se nisan banata tha, aaj khidkiyon me itne pahre hain ki dhul ajnabi ho gayi. Mera bachpan to bahut suhana raha bas ab aage apne bacchon ko waisa hi bachpan dene ki koshish jarur karunga.Taki kuch salon baad mere bacche bhi isi tarah kuch apne bachpan ko yaad kar likh saken.